பாலிடெக்னிக் தேர்வு கட்டணம் செலுத்த அவகாசம் நீட்டிப்பு தொழில்நுட்ப கல்வி இயக்ககம் உத்தரவு

பாலிடெக்னிக் தேர்வு கட்டணம் செலுத்த அவகாசம் நீட்டிப்பு தொழில்நுட்ப கல்வி இயக்ககம் உத்தரவு கொரோனா தொற்று காரணமாக கல்லூரிகளில் வகுப்புகள் ஆன்லைன் மூலமாக நடத்தப்பட்டு வருகிறது. அதே போல் தேர்வும் ஆன்லைன் வாயிலாகவே நடத்தப்படுகிறது. அந்தவகையில், பாலிடெக்னிக் படிப்புகளில் 1, 3, 5 மற்றும் 7-ம் செமஸ்டர் பயின்ற மாணவர்களுக்கு, தேர்வு கடந்த ஆண்டு டிசம்பர் மற்றும் கடந்த ஜனவரி, பிப்ரவரி மாதங்களில் தொழில்நுட்பக் கல்வி இயக்ககத்தால் நடத்தப்பட்டது. அவர்களுக்கான தேர்வு முடிவு கடந்த 31-ந்தேதி வெளியானது. 

அதன் தொடர்ச்சியாக 2, 4 மற்றும் 6 செமஸ்டர் பயின்று வரும் மாணவர்களுக்கு தேர்வு (அரியர் தேர்வு உள்பட) வருகிற 14-ந்தேதி முதல் அடுத்த மாதம் (ஜூலை) 14-ந்தேதி வரை நடப்பு செமஸ்டர் தேர்வு நடத்தப்பட இருக்கிறது. இதற்கான தேர்வு கட்டணத்தை செலுத்துவதற்கு 10-ந்தேதி வரை அவகாசம் வழங்கப்பட்ட நிலையில், தற்போது 14-ந்தேதி வரை அவகாசம் நீட்டிக்கப்பட்டுள்ளதாக தொழில்நுட்ப கல்வி இயக்ககம் தெரிவித்து இருக்கிறது. மாணவர்கள் அதனை பயன்படுத்தி தேர்வு கட்டணத்தை முறையாக செலுத்தி, ஆன்லைன் வாயிலாக நடைபெறும் இந்த தேர்வில் கலந்து கொள்ள அறிவுறுத்தப்பட்டு இருக்கின்றனர்.