தோள்களை வலுவாக்கும் பயிற்சிகள்

தோள்களை வலுவாக்கும் பயிற்சிகள் 

பெண்கள் மட்டுமல்ல, செல்போன் மற்றும் கணினியே கதி என்று இருக்கும் அநேகருக்கும் ஏற்படக்கூடியது தோள்பட்டை வலி அதற்கு காரணம் நிண்ட நேரம் குனிந்த நிலையில் வேலை செய்வது, கூன்' போட்டு உட்காருவது மற்றும் தோள் பகுதிகளில் அதிக சதை வளர்ச்சி போன்றவைதான். இவற்றை சரி செய்ய, தோள்பட்டையை வலுப்படுத்தக்கூடிய சில பயிற்சிகளை செய்தாலே போதும். 

ஸ்டாப் போஸ் 

தரை விரிப்பில் குப்புறப்படுத்து, கைகளை நெஞ்சுப் பகுதியின் பக்கவாட்டில் வைத்து, முழங்கை உடலை ஒட்டியுள்ளபடி முதலில் மேல் உடலை மட்டும் சற்று உயர்த்தவும். பிறகு கால் விரல் களில் அழுத்தம் கொடுத்து கீழ் உடலை சற்று உயர்த்தவும். தலை தரையைப் பார்த்த நிலையில் இருக்க வேண்டும். 30 விநாடிகள் இந்த நிலையில் இருந்து, மீண்டும் பழைய நிலைக்கு செல்லலாம். 

10 விநாடிகள் இடைவெளியுடன் இந்தப் பயிற்சியை 10 முறை செய்யலாம். நாளடைவில், கால் விரல்கள் தரையில் படாதபடி கைகளில் அழுத்தம் கொடுத்து முழு உடலை யும் உயர்த்த வேண்டும். இந்தப் பயிற்சியின்போது தலை, தோள்பட்டை மற்றும் முதுகுத்தண்டு ஒரே நேர்கோட்டில் இருக்க வேண்டும். இந்தப் பயிற்சி கை, கால் மற்றும் தோள்பட்டைக்கு வலிமை தரும். 'கூன்' விழும் பிரச்சினையை சரி செய்யும். உடலில் உள்ள அதிக அளவு கலோரியை எரித்து, தொப்பையைக் குறைக்க உதவும். 

டால்பின் போஸ் 

தரை விரிப்பில் முழங்காலிட்டு படுத்து கைகளை முன்னோக்கி வைத்து, முழங்கை தரையில் படும்படி குனியவும். இப்போது முழு உடல் எடையையும், முழங்கை மற்றும் தோள்பட்டை தாங்கிக்கொண்டிருக்கும். பிறகு முழங்கையில் அழுத்தம் கொடுத்து, மெதுவாக உடலை மேல் நோக்கி உயர்த்தவும். அதேபோல் கால் விரல்கள் மட்டும் தரையில் படும்படி அழுத்தம் கொடுத்து இடுப்பை மேலே உயர்த்தவும். இந்த நிலையில் சில விநாடிகள் இருக்கலாம். பிறகு மீண்டும் பழைய நிலைக்கு வரலாம். இதேபோல் பத்து முறை செய்யலாம். இது முதுகு தோள் பட்டை மற்றும் கை தசைகளில் உள்ள பிடிப்பை நீக்கி வலுப்படத்தும்.  இப்பயிற்சி செய்யும்போது மார்பக பகுதி விரிவடைந்து, சுவாச செயல்பாடு மேம்படும்.