பிளஸ்-2 மதிப்பெண் சான்றிதழ் பள்ளிகளில் 31-ந்தேதி முதல் பெறலாம்

பிளஸ்-2 மதிப்பெண் சான்றிதழ் பள்ளிகளில் 31-ந்தேதி முதல் பெறலாம் 

பிளஸ்-2 பொதுத்தேர்வு முடிவு வெளியிடப்பட்டு, தேர்ச்சி பெற்ற மாணவ-மாணவிகள் உயர்கல்வியில் சேருவதற்கான முயற்சிகளில் தீவிரமாக ஈடுபட்டு வருகின்றனர். அந்த வகையில் தற்காலிக மதிப்பெண் சான்றிதழை கொண்டு அவர்கள் உயர்கல்வியில் சேர்ந்து வருகின்றனர். அசல் மதிப்பெண் சான்றிதழை எப்போது பள்ளிக்கல்வித்துறை வழங்கும்? என்ற எதிர்பார்ப்பில் மாணவர்களும், பெற்றோரும் இருந்து வந்தனர். இதுதொடர்பாக சமீபத்தில் அரசுத்தேர்வுத்துறை உயர் அதிகாரியை தொடர்புகொண்டு கேட்டபோது, இம்மாத இறுதிக்குள் வழங்கப்படும் என்று தெரிவித்தார். அந்த செய்தி 'தினத்தந்தி'யில் பிரசுரிக்கப்பட்டது. 

அந்த உயர் அதிகாரி தெரிவித்தபடி, தற்போது அசல் மதிப்பெண் சான்றிதழ் வருகிற 31-ந்தேதி (திங்கட்கிழமை) முதல் பெற்றுக்கொள்ளலாம் என்று அரசுத்தேர்வுத்துறை இயக்ககம் அறிவித்துள்ளது. இதுதொடர்பாக அரசுத்தேர்வுத்துறை வெளியிட்டுள்ள செய்திக்குறிப்பில் கூறப்பட்டு இருப்பதாவது:- பிளஸ்-2 பொதுத்தேர்வு எழுதிய தேர்வர்களுக்கு, பிளஸ்-1 மற்றும் பிளஸ்-2 அசல் மதிப்பெண் சான்றிதழ்கள், மதிப்பெண் பட்டியல் வருகிற 31-ந்தேதி முதல் வழங்கப்படும். பள்ளி மாணவர்கள் தாங்கள் படித்த பள்ளி வாயிலாகவும், தனித்தேர்வர்கள் தாங்கள் தேர்வு எழுதிய தேர்வுமையம் வாயிலாகவும் பெற்றுக்கொள்ளலாம். இவ்வாறு அதில் தெரிவிக்கப்பட்டுள்ளது. இதேபோல், பிளஸ்-1 துணைத்தேர்வு எழுதியவர்களுக்கான தேர்வு முடிவு நாளை (வெள்ளிக்கிழமை) வெளியிடப்பட உள்ளது. தேர்வு முடிவை www.dge.tn.gov.in என்ற இணையதளத்தில் சென்று தெரிந்துகொள்ளலாம்.