கோடை விடுமுறை எப்போது தொடங்கும்? தேர்வு அட்டவணை மாற்றத்தால் ஏற்பட்ட குழப்பத்துக்கு அதிகாரிகள் விளக்கம்

கோடை விடுமுறை எப்போது தொடங்கும்? தேர்வு அட்டவணை மாற்றத்தால் ஏற்பட்ட குழப்பத்துக்கு அதிகாரிகள் விளக்கம் 

ஆண்டு இறுதித்தேர்வு அட்டவணை மாற்றத்தால் மாணவ-மாணவிகள் மற்றும் அவர்களின் பெற்றோர் கோடை விடுமுறை எப்போது தொடங்கும் என்ற குழப்பத்துக்கு தள்ளப்பட்டுள்ளனர். இந்த குழப்பத்துக்கு அதிகாரிகள் விளக்கம் அளித்தனர். 

  

ஆண்டு இறுதித்தேர்வு பிளஸ்-2, பிளஸ்-1 வகுப்பு மாணவ-மாணவிகளுக்கு பொதுத்தேர்வு நிறைவு பெற்றுவிட்டது. அதனைத்தொடர்ந்து எஸ்.எஸ்.எல்.சி. மாணவர்களுக்கு வருகிற 8-ந் தேதியுடன் முடிவடைய இருக்கிறது. இதனைத் தொடர்ந்து 1 முதல் 9-ம் வகுப்பு வரையிலான மாணவ-மாணவிகளுக்கு நாடாளுமன்ற தேர்தலை முன்னிட்டு முன்கூட்டியே ஆண்டு இறுதித்தேர்வை நடத்தி முடிக்க பள்ளிக்கல்வித்துறை முடிவு செய்து அதற்கேற்றாற்போல் அட்டவணையையும் வெளியிட்டது. 2-ந் தேதி தொடங்கி 12-ந் தேதியுடன் தேர்வு நிறைவு பெறுவதாகவும், 13-ந் தேதி முதல் கோடை விடுமுறை விடப்படுவதாகவும் அந்த அட்டவணையில் தெரிவிக்கப்பட்டு இருந்தது. 

கோடை விடுமுறை எப்போது? இந்த நிலையில் கடந்த 29-ந் தேதி ஆண்டு இறுதித்தேர்வு அட்டவணையில் சில மாற்றங்கள் செய்யப்பட்டு இருப்பதாக பள்ளிக்கல்வித்துறை அறிவிப்பு ஒன்றை வெளியிட்டது. அதில் ரம்ஜான் பண்டிகையை முன்னிட்டு 10 மற்றும் 12-ந் தேதிகளில் 4 முதல் 9-ம் வகுப்பு வரையிலான மாணவ-மாணவிகளுக்கு நடத்தப்பட இருந்த அறிவியல், சமூக அறிவியல் தேர்வுகளை முறையே வருகிற 22 மற்றும் 23-ந் தேதிகளுக்கு மாற்றி அமைக்கப்பட்டுள்ளதாக தெரிவித்திருந்தது. இதனால் ஏற்கனவே அறிவிக்கப்பட்டு இருந்த கோடை விடுமுறை எப்போது தொடங்கும்? அதுமட்டுமல்லாமல், தேர்வு தேதி மாற்றப்பட்ட நாட்களில் அதாவது, 10 மற்றும் 12-ந் தேதிகளில் வகுப்புக்கு வர வேண்டுமா? 12-ந் தேதியில் இருந்து 22-ந் தேதி வரையிலான இடைப்பட்ட நாட்களில் (சனி மற்றும் ஞாயிற்றுக்கிழமை நீங்கலாக) பள்ளிக்கு மாணவர்கள் வர வேண்டுமா? என்ற குழப்பத்தில் மாணவ-மாணவிகளும், பெற்றோரும் இருந்து வருகின்றனர். 

அதிகாரிகள் விளக்கம் இதுதொடர்பாக பள்ளிக்கல்வித்துறை உயர் அதிகாரிகளை தொடர்புகொண்டு கேட்டபோது, ‘10 மற்றும் 12-ந் தேதிகளில் நடத்தப்பட இருந்த தேர்வுகள் மட்டுமே 22 மற்றும் 23-ந் தேதிகளுக்கு மாற்றப்பட்டு உள்ளது. எனவே 10 மற்றும் 12-ந் தேதிகளில் வகுப்பு நடைபெறும். அதன்பின்னர், 22 மற்றும் 23-ந் தேதி நடைபெறும் தேர்வுக்கு மட்டும் மாணவர்கள் வந்தால் போதும். 

இடைப்பட்ட நாட்கள் ஏற்கனவே வெளியிட்டு இருந்த அறிவிப்புபடி கோடை விடுமுறை கணக்கில்தான் வரும். ஆசிரியர்களை பொறுத்தவரையில், இடைப்பட்ட இந்த நாட்களில் தேர்தல் பணிகளில் ஈடுபடுவார்கள். மேலும் அவர்களுக்கு 26-ந் தேதி வரை வேலை நாட்கள் இருக்கிறது' என்றனர். 10 மற்றும் 12-ந் தேதிகளில் தேர்வு இல்லை. ஆனால் பள்ளிக்கு வரவேண்டும் என்று பள்ளிக்கல்வித்துறை தெரிவித்திருக்கும் நிலையில், அந்த நாளில் ஏற்கனவே வெளியிட்டிருந்த அட்டவணைப்படியே தேர்வை நடத்திவிடலாமே என்று கல்வியாளர்களும், பெற்றோரும் கருத்துகளை தெரிவித்துள்ளனர்.